Indiaya ti Department of Justice (DOJ) ita a Martes, Nobiembre 25, ti maysa a milion a pisos (₱1-milion) a gunggona para iti impormasion a mangitunda iti pannakakemmeg ni Cassandra Li Ong, maysa kadagiti kadua nga akusado ni dati a presidential spokesperson Harry Roque kadagiti kaso a qualified human trafficking a pending iti Pasig City regional trial court (RTC).
Iwaragawag ni Acting DOJ Secretary Fredderick A. Vida ti nasao a gunggona bayat ti press briefing ita nga aldaw, Nobiembre 25.
Idi Lunes, Nobiembre 24, imbilin ti Pasig City RTC ti pannakakanselar ti pasaporte da Ong, Roque, Dennis L. Cunanan, Ronelyn Bahan Baterna, ken Mercides Peralta Macabasa.
Idi Mayo, nangipaulog ti trial court iti arrest warrant kontra kadagiti nadakamat a tattao gapu iti kaso a qualified human trafficking a pakairamanan ti mapapati a kriminal nga aktibidad ti Lucky South 99, maysa a Philippine Offshore Gaming Operator (POGO) iti Porac, Pampanga nga inserra ti gobierno.
Dati a presidente Duterte, 'fit to participate' iti ICC, segun kadagiti medical expert
Naitudo ni Ong a kas autorisado a pannakabagi ti Lucky South 99 idinto a ni Roque ti nainaganan kas abogado ti kompania.
Idi Agosto itay napan a tawen, inarestar dagiti lokal nga autoridad ti Indonesia ni Ong kalpasan a nagtalaw iti Filipinas bayat ti agtultuloy a legislative hearing iti kriminal nga aktibidad dagiti POGO.
Segun ken ni Vida, saan nga umdas ti agdama nga impormasion nga adda iti DOJ, isu a mangidiayada iti gunggona. Innayonna a maibatay iti beripikado nga impormasion, awan pay rekord ti ania man nga ipapanaw ni Ong iti Filipinas. (Jeffrey Damicog/MANILA BULLETIN)
