Naarestar dagiti 16 a Chinese national iti Manila, maysa kadakuada ti addaan iti detention warrant iti pagilianna, segun iti Bureau of Immigration (BI) idi Nobiembre 25.
Binigbig ni BI Commissioner Joel Anthony M. Viado ti pugante a ni Chen Qinguang, 38, a maysa a wanted iti China gapu iti nadagsen nga economic crimes.
Naarestar ni Chen babaen ti panangraut nga insayangkat dagiti kameng ti BI Fugitive Search Unit (BI-FSU) idi Nobiembre 21 iti Sunland Building iti San Miguel, Manila.
Patien ni Viado a ti pasdek ket maysa a mangipapaay kadagiti gadget nga usaren dagiti scam operator, ta nasamsamda ti rinibu a gadget ken electronic device a gagangay a mausar kadagiti online a panangallilaw wenno illegal nga operasion iti internet.
Senado, pinasingkedanna ti ₱6.793-trilion a nailian a badiet para 2026
Tarigagay dagiti BI-FSU a kemmegen ni Chen nga addaan iti aktibo a detention warrant nga impaulog ti Quanzhou Public Security Bureau idi 2019.
Iti sabali a bangir, natakuatanda nga awan ti balido a pasaporte wenno ania man nga immigration document dagiti 15 a Chinese national a nakemmegda.
Addan iti kustodia ti BI dagiti naarestar, ket agur-urayda iti pannakaideportarda iti pagilianda. (Jeffrey Damicog/Manila Bulletin//Lito Hilidon/Bannawag)
