Impalgak ti Pasig Regional Trial Court (RTC) Branch 157 ti pannakakanselar ti pasaporte da dati a presidential spokesperson Atty. Harry Roque, Lucky 99 Representative Cassandra Ong, ken tallo pay a kaduada a naidarum iti kaso a human trafficking bayat ti agtultuloy a panagimbestigar iti mapapati nga illegal nga aktibidad dagiti Philippine Offshore Gaming Operators (POGO) iti Porac, Pampanga.
Segun iti autoridad, naipila ti kaso gapu iti panna-rescue dagiti 158 a ganggannaet nga empleado manipud iti Lucky 99 scam hub, nga idiay a naparparigatda, nakidnap, ken nabiktimada iti sex trafficking.
Iti maysa a dokumento a naipaulog idi Nobiembre 19, inaprobaran ni Pasig RTC Branch 157 Presiding Judge Ana Terese Cornejo Tomacruz ti petision a pannakakanselar ti pasaporte da Roque, Ong, Ronelyn Baterna, Dennis Cunanan, ken Mercides Peralta Macabasa.
Nangipaulog met ti Pasig RTC iti hold departure order a maibusor kadagiti naidarum.
Senado, pinasingkedanna ti ₱6.793-trilion a nailian a badiet para 2026
Kinuna ni Philippine National Police (PNP) acting chief Lt. Gen. Jose Melencio Nartatez Jr. a sisasaganadan ken dagiti maseknan nga ahensia tapno arestarenda ni Roque, kalpasan a nagkiddaw ti gobierno ti Filipinas iti International Criminal Police Organization (Interpol) a mangipaulog iti Red Notice kontra kenkuana.
Sapsapulen metten dagiti polis ni Ong, a nai-report nga addan iti Japan.
Kinuna ni Nartatez a pinapigsa ti PNP ti pannakikoordinarda kadagiti kakaduada iti ballasiw taaw tapno sawarenda ti yan ni Ong. (Patrick Garcia/Manila Bulletin//Lito Hilidon/Bannawag)
