Limmabasen ni Tropical Depression (TD) "Verbena" iti Guimaras ken abagatan a laud a paset ti Panay, ket tuparenna itan ti Sulu Sea, segun iti pakdaar ti Philippine Atmospheric, Geophysical and Astronomical Services Administration (PAGASA) itay 11:00 ti aldaw (Nobiembre 25).
Nasaripatapatan ti PAGASA ni TD Verbena iti baybay ti Hamtic, Antique itay 10:00 ti aldaw, ken agpalaud amianan a laud iti kapardas a 35 a kilometro kada oras.
Agpigsa ni Verbena iti 55 a kilometro kada oras iti asideg ti sentrona, ken pugso nga agingga iti 90 a kilometro kada oras.
Adda latta iti Tropical Cyclone Wind Signal No. 1 ti Occidental Mindoro, Oriental Mindoro, Romblon, ti amianan ken sentro a paset ti Palawan (Araceli, Taytay, El Nido, Dumaran, Roxas, San Vicente, and Puerto Princesa City), agraman ti Calamian, Cuyo, ken Cagayancillo Islands, ken ti kadaklan a Masbate (Balud, Mandaon, Milagros, Cawayan, Placer, Pio V. Corpuz, Esperanza, Uson, Dimasalang, City of Masbate, Mobo, Palanas, Aroroy, Cataingan, ken Baleno), Antique, Aklan, Capiz, Iloilo, Guimaras, Negros Occidental, Negros Oriental, ken Cebu.
Mapukpukaw a nobia, nasarakan iti Pangasinan
Ekspektaren ti PAGASA a lumabas wenno umasideg ni Verbena iti Cuyo Islands ita a malem ken agdisso iti amianan a paset ti Palawan inton rabii, ken agbalin a tropical storm apaman a makaasideg iti Palawan iti sumaruno a 12 nga oras. (Ma. Cristina Arayata/PNA//Lito Hilidon/Bannawag)
