Kalpasan ti panagdissona iti Caraga ken Central Visayas, tuparen met ita ni Tropical Depression "Verbena" ti Negros Island Region, segun iti Philippine Atmospheric, Geophysical and Astronomical Services Administration (PAGASA) ita nga aldaw, Nobiembre 25.
Umuna a nagdisso ni Verbena iti Bayabas, Surigao del Sur idi Nobiembre 24 iti 1:30 iti malem, sa iti Jagna, Bohol iti 11:10 iti rabii; ken iti Talisay, Cebu itay 2:40 iti parbangon (Nobiembre 25).
Nasaripatpatan ti PAGASA ti sentro ni Verbena iti baybay ti Pinamungahan, Cebu.
Nagtalinaed ti kapigsa ni Verbena a 55 a kilometro kada oras iti asideg ti sentrona, ken pugso nga agingga iti 90 a kilometro kada oras, ket agpaamianan a laud iti kapardas a 25 a kilometro kada oras.
Senado, pinasingkedanna ti ₱6.793-trilion a nailian a badiet para 2026
Nagtalinaed iti Tropical Cyclone Wind Signal No. 1 ti Occidental Mindoro, Oriental Mindoro, Romblon, amianan ken sentro a paset ti Palawan, agraman ti Calamian, Cuyo, ken Cagayancillo Islands, kadaklan ti Masbate (Balud, Mandaon, Milagros, Cawayan, Placer, Pio V. Corpuz, Esperanza, Uson, Masbate City, Mobo, Palanas, Aroroy, Cataingan, Baleno), Antique, Aklan, Capiz, Iloilo, Guimaras, Negros Occidental, Negros Oriental, Siquijor, Cebu, Bohol, Samar, Eastern Samar, Biliran, Leyte, Southern Leyte, Dinagat Islands, Surigao del Norte, ti amianan a paset ti Surigao del Sur (Carrascal, Cantilan, Madrid, Carmen, Lanuza, Cortes, San Miguel, Tandag City, Tago), Agusan del Norte, ti amianan a daya a paset ti Agusan del Sur (Sibagat), Camiguin, Misamis Oriental, ti amianan a paset ti Misamis Occidental (Sapang Dalaga, Calamba, Baliangao, Plaridel, Lopez Jaena, Oroquieta City, Aloran, Panaon, Jimenez, Concepcion), ken ti amianan a paset ti Zamboanga del Norte (Jose Dalman, Manukan, President Manuel A. Roxas, Katipunan, Dipolog City, Polanco, Piñan, Dapitan City, La Libertad, Sibutad, Rizal, Mutia).
Segun iti PAGASA, agtultuloy ti tignay ni Verbena nga agpalaud-amianan a laud iti Visayas ken amianan a paset ti Palawan ita nga aldaw, sakbay a mapan iti West Philippine Sea inton Mierkoles, Nobiembre 26.
Ekspektaren ti PAGASA nga agpalaud latta ni Verbena, lumabas iti amianan ti Kalayaan Island Group, ken rummuar iti Philippine Area of Responsibility inton agsapa ti Huebes, Nobiembre 27. (Ellalyn De Vera-Ruiz/Manila Bulletin//Lito Hilidon/Bannawag)
