Ilunglungalong dagiti diputado ti Liberal Party (LP) ti gakat a linteg a mangilaksid kadagiti Overseas Filipino Workers (OFWs) iti panagbayadda iti mandatory a kontribusion iti Philippine Health Insurance Corporation (PhilHealth).
Impila da Rep. Leila de Lima (Mamamayang Liberal [ML] Party-list), Arlene “Kaka” Bag-ao (lone district, Dinagat Islands), ken Cielo Krisel Lagman (1st district, Albay) ti House Bill (HB) No. 6355 para iti daytoy a panggep.
Amendaran daytoy ti Section 4(f) ti Republic Act (RA) No.11223 wenno ti “Universal Healthcare (UHC) Act,” ket maikkat ti "migrant workers" kadagiti listaan dagiti maibilang a “direct contributors” iti PhilHealth, ket agbalin laengen daytoy a boluntario.
Segun kadagiti babbai a mammanday-linteg, gapu iti dakkel a maitultulong dagiti OFW iti panagdur-as ti pagilian, maiparbeng a mailaksidda iti maulit-ulit ken iti adu unayen a bakbaklayenda. Ngarud, nainkalintegan ti panagbalin a boluntario laengen ti panagbayadda iti PhilHealth.
Mapukpukaw a nobia, nasarakan iti Pangasinan
Sipud iti pannakabukel ti RA No. 11223 idi 2019, adun dagiti nakitada a pagkurangan ken rumbeng a tarimaanen a paset ti linteg.
Maysa kadagiti masapul a matarimaan ti pannakairaman dagiti OFW iti listaan dagiti maibilang a direct contributor a masapul nga agbayad iti dakkel al kontribusion iti PHilHelath.
"Kaaduan kadagiti OFW ket land-based. No agsakitda, awanda iti pagilian. Awan met ti accredited nga ospital nga umawat iti PhilHealth iti pagilian a yanda. Agbaybayadda ngarud nga awan met maganabda a benepisio," kinuna ni Lagman.
Innayon ni De Lima a no pudno a bigbigen ti gobierno ti dakkel a maitultulong dagiti OFW iti kagimongan ken iti ekonomia, nainkalintegan laeng a maikkanda iti kastoy a pangliwliwa, bayat a sigaraduen ti Estado ti napintas a serbisio para kadagiti pamiliada nga adda iti Filipinas. (Ellson Quismorio/Manila Bulletin//Lito Hilidon/Bannawag)
