Impalgak ni dati a presidential spokesman Harry Roque a saan a pudno dagiti report a naarestaren isuna iti The Hague, Netherlands, ket inlawlawagna a saan a natuloy ti biahena iti eroplano a mapan iti Vienna, Austria gapu iti "unfit to travel" a kasasaadna.
Daytoy ti kinuna ni Roque sumagmamano nga oras kalpasan ti waragawag ti Department of Foreign Affairs (DFA) a kinanselardan ti pasaporte ni Roque, kas imbilin ti Pasig City Regional Trial Court (RTC).
Iti maysa nga interbiu idi Nobiembre 25, kinuna ni Roque -- a naidarum iti kaso a human trafficking -- a boluntario isuna a napan kadagiti autoridad iti eropuerto.
Inlawlawag ni Roque nga idi sinaludsod dagiti autoridad no kayatna ti agbiahe, imbagana a saan a mabalin ta adda dua a medical certificate-na nga agkunkuna a saan isuna a mabalin nga agbiahe iti eroplano ta namindua a naoperaran.
Senado, pinasingkedanna ti ₱6.793-trilion a nailian a badiet para 2026
Idi naibagana daytoy, kiniddaw dagiti autoridad ti eropuerto a bumaba daytoyen iti eroplano.
Inlawlawag ni Roque a maibasar iti paglintegan ti Dublin ti European Union, saan isuna a mabalin nga agkiddaw iti asylum iti Netherlands, no di ket iti pagilian a nangted kenkuana iti visa a sumrek iti EU.
Nagapelar ni Roque iti media nga agbalinda koma a natakneng iti panag-report-da, kalpasan a nai-report idi Nobiembre 25 a naarestar isuna iti pagdagdagusanna a balay iti The Hague. (Raymund Antonio/Manila Bulletin//Lito Hilidon/Bannawag)
