Kinanselaren ti Department of Foreign Affairs (DFA) ti pasaporte da dati a presidential spokesman Harry Roque ken Katherine Cassandra Li Ong ti Lucky 99 scam hub, kas mayannurot iti probision ti RA No 11983 ken iti pagaladaganda.
Daytoy ti inawaragawag ti DFA idi Nobiembre 25 kalpasan a naawatda ti Omnibus Resolution nga impaulog ti Pasig Regional Trial Court (RTC) Branch 157.
Nawaswas met ti pasaporte ti dadduma pay a kakadua da Roque ken Ong a naidarum a da Ronelyn Baterna, Mercides Macabasa, ken Dennis Lacson Cunanan.
Nupay kasta, saan pay a nasungbatan ti DFA ti saludsod no kaano a nakanselar ti pasaporte dagiti naidarum, idinto a kinuna ti panakangiwat ti DFA a ni Angelica Escalona a patpatalgedanda pay laeng no agpayso ti report a naarestaren ni Roque.
Mapukpukaw a nobia, nasarakan iti Pangasinan
Impalgak ti Facebook page a Politiko a nakemmeg ni Roque iti pagdagdagusanna a balay iti The Netherlands.
Ngem iti Facebook page ni Roque, kinunana a saan a pudno a naarestar, ket impaskilna ti ladawan ti boarding pass-na a mapan iti Vienna, Austria idi Nobiembre 25.
Naidarum ni Roque iti kaso a qualified human trafficking mainaig iti mapapati a pannakairamanna iti operasion ti Lucky 99 scam hub, maysa a POGO iti Porac, Pampanga.
Adda nakapila nga asylum application ni Roque iti The Netherlands, gapu iti kunana a politikal a panangidadanes kenkuana ti administrasion ni Marcos gapu iti kinasingedna kadagiti Duterte. (Raymund Antonio/Manila Bulletin//Lito Hilidon/Bannawag)
