Inanamongan ni Mamamayang Liberal (ML) Party-list Rep. Leila de Lima ti imbaga ni presidential son, House Majority Leader Ilocos Norte 1st district Rep. Sandro Marcos, a destabilisasion ti panggep dagiti video ken wagas nga ar-aramiden ni dati a kongresman Zaldy Co.
Impaganetget ni De Lima a masapul nga idatag ni Co dagiti alegasionna iti umisu a lugar, tapno mataming ken matingiting daytoy.
Iti kaudian a video nga inruar ni Co, kinunana nga adda kano insingit ni Rep. Marcos a proyekto nga agbalor iti ₱51 a bilion iti General Appropriations Acts (GAA) wenno national budget idi 2023, 2024, ken 2025.
Malaksid pay daytoy iti immuna nga alegasionna a nangisingit ni Presidente Marcos Jr. iti proyekto nga agbalor iti ₱100 a bilion idi 2025, ket nakaala iti ₱25 a bilion a kickbak manipud iti daytoy.
Marcos, Robredo, nagsarak iti Naga city
Iti biang ni Deputy Minority Leader De Lima, no kastoy laeng ti estilo nga aramiden ni Co a mangiruar kadagiti kastoy a bambanag, saan nga ammo no agpayso dagitoy wenno parparbo laeng.
Kinuna ni De Lima nga iti paniriganda, ti ar-aramiden ni Co ket paset ti maysa a panggep a destabilisasion, wenno panangtippuog iti gobierno, banag a rumbeng a liklikan ta adda saan a nasayaat a pagbanagan dagitoy.
Segun ken ni De Lima, no pudno dagiti ibagbaga ni Co, masapul nga agawid daytoy iti pagilian ket takderanna ti saona, iruar ken iparangna dagiti ebidensia iti umno a lugar. (Ellson Quismorio/Manila Bulletin//Lito Hilidon/Bannawag)
