Agdagup iti walo a makunkuna a “cong-tractors” wenno kongresista nga addaan iti pannakainaig kadagiti kompania ti konstruksion ti nairekomendar para iti imbestigasion ken pannakadarum ti Independent Commission for Infrastructure (ICI) gapu iti mapapati a panaglabsingda iti 1987 Constitution.
Segun ken ni ICI chairman retired Supreme Court associate justice Andres Reyes Jr., nakipaset dagitoy a kongresista kadagiti aktibidad a mapapati nga addaan conflict of interest iti posisionda iti gobierno.
Ngem asino kadi dagitoy a “cong-tractor” ken ania ti naglabsingan a pakaseknan ti ICI?
1. Dati nga Ako Bicol Party-list Rep. Zaldy Co
Kasapulan ti natibker ken nainkalintegan a pagtaktakderan iti parikut iti WPS --NMC
Segun iti ICI, kabagian ni Rep. Co ti akinkukua iti FS Co Builders and Supply, a nakaala iti 40 nga infrastructure works manipud 2020 agingga 2024 para kadagiti dadakkel a civil works nga aggatad iti ₱3.8 a billion.
Kabsat ni Zaldy Co ti agdama a bise gobernador ti Albay a ni Farida Salcedo Co, ti sole proprietor ti nasao a kompania.
Addaan ti FS Co Builders and Supply iti joint venture iti HiTone Construction and Development Corporation nga impasdek ni Christopher Co, kabsat ni Co.
2. Construction Workers Solidarity (CWS) Party-list Rep. Rep. Edwin Gardiola
Intudo ti ICI ti relasion ni Gardiola kadagiti tallo a kompania ti konstruksion a Newington Builders, Inc., Lourel Development Corporation, ken S-Ang General Construction & Trading Inc.
Segun iti ICI, kabsatna ni Elmer Gardiola, ti bise presidente ken tesorero ti Newington ken asawa ti majority stockholder ti kompania a ni Elaine Gardiola.
Kasta met a kabsatna pay ni Eaerel Benedicto Gardiola, ti incorporator ti Lourel Development Corporation.
Dagiti stockholder ken direktor ti S-Ang General Construction & Trading Inc. ket asideg a pamilia ni Rep. Gardiola: Ni Judy Gardiola, ti asawana, ket maysa nga stockholder ken chairman ti S-Ang.
Dagiti annakna—da Kim Ann Esguerra, Katrina Mara Katigbak, Kaila Gardiola, ken KenMartin Gardiola—ket stockholder, direktor, ken opisial ti S-Ang.
Naikkan dagiti tallo a kompania iti di kumurang a 211 nga infrastructure projects para kadagiti dadakkel a civil works nga aggatad iti ₱9.2 a billion manipud 2016 agingga 2024 .
3. USWAG Ilonggo Party-list Rep. James Ang
Kinuna ti ICI nga uliteg ni Rep. Ang ni Alfonso Tan, maysa kadagiti dua a kangrunaan nga stockholder ti IBC International Builders Corporation ken Allencon Development Corporation, a naikkan iti 241 nga infrastructure projects manipud 2016 agingga 2024 para kadagiti dadakkel a civil works nga aggatad iti ₱11 a billion.
4. PUSONG PINOY Party-list Rep. Jernie Nisay
Intudo ti ICI ni Nisay, a sole proprietor ti JVN Construction and Trading, maysa a kompania a nakagun-od iti ₱73 a million a balor dagiti proyekto.
5. Bulacan 2nd district Rep. Agustina Pancho
Kinuna ti ICI a kabagian ni Pancho ti amin nga stockholders ti C.M. Pancho Construction, Inc., a nakaala iti ₱1 a bilion a gatad dagiti proyekto ti impraestruktura. Dagiti kabagianna: Gerardo Villacorta Pancho, Mathilda Pancho Brobio, Pedro Villacorta Pancho, Clemente Villacorta Pancho, Antonio Villacorta Pancho, ken Felicita Villacorta Pancho.
6. Cagayan 3rd district Rep. Joseph Lara
Kinuna ti ICI a dagiti annak ni Lara a da Joseph Jeremy, Joseph Kyle, Joseph Joshua, ken Joseph Lara II ket stockholders ti JLL Pulsar Construction Corporation, a nakagun-od iti ₱11 a billion.
7. Surigao del Norte 1st district Rep. Francisco Matugas
Ti kaanakan ni Matugas a ni Ronald Matugas Abejo ti kangrunaan nga stockholder ti Boometrix Development Corp. Naikkan daytoy iti ₱8 a billion a gatad dagiti kontrata ti impraestruktura ti gobierno.
8. Tarlac 3rd district Rep. Noel Rivera
Ni Rivera ti kangrunaan nga stockholder ti Tarlac 3-G Construction & Development Corporation. Nakaawat daytoy iti 72 nga infrastructure projects nga aggatad iti ₱2.3 a billion.
Iti panangaramidda iti rekomendasion, dinakamat ni Reyes ti Article 6 Section 14 ti 1987 Constitution a mangibinsabinsa kadagiti panangiparit kadagiti kameng ti Kongreso maipapan iti pinansial nga interes.
"Ibagbaga (ti Konstitusion) nga awan ti miembro a mabalin a pinansial nga interesado kadagiti kontrata ti gobierno, prangkisa wenno espesial a pribilehio bayat ti terminoda," kinuna ni Reyes.
"Maiparitda met a bumallaet kadagiti bambanag ti gobierno para iti bukodda a personal a pagimbagan wenno no sadino a ti opisinada ket mabalin a mangimpluensia," innayonna.
Indagadag ni Reyes iti Office of the Ombudsman a kitaenda met ti posible a panaglabsing dagiti walo a "cong-tractor" iti Anti-Graft and Corrupt Practices Act, Direct Bribery, Code of Conduct and Ethical Standards for Public Officials and Employees, ken ti New Government Procurement Act. (Joseph Pedrajas/MB)
