Palpalutpoten pay laeng ti Department of Foreign Affairs (DFA) ti report nga adda sumagmamano a Filipino a nairaman iti dakkel nga uram iti maysa a residential complex iti Hong Kong.
Segun iti DFA itay Nobiembre 27, adda naawatda nga “unverified report" nga adda sumagmamano a Filipino a saan a nakaruar manipud iti uram iti maikalima a kadsaaran a nagwaras iti nadumaduma a pasdek.
Ngem inlawlawag ti DFA nga awan pay ti kompirmado a report a naawat ti Philippine Consulate General iti Hong Kong mainaig kadagiti Filipino a natay wenno nadangran iti nauram a pasdek nga adda iti Tai Po iti New Territories.
Kuna ti DFA nga ar-aramiden ti Hong Kong Fire Services Department ti amin a kabaelanda tapno masebseban ti pasdek a maur-uram latta agingga ita. Ket gapu iti kinasaknap ken kadakkel ti uram, mabalin a mabayag pay a maammuanda ti kadakkel ti nadadael ken aktual a bilang dagiti biktima.
Kasukat ti arsobispo ti New Orleans, innaganan ni Papa Leo XIV kalpasan ti $230-million a sex abuse settelement
Maibasar iti kaudian a report ti media, mapanen a 44 a tao ti natay, idinto a 279 ti mapukpukaw bayat a sawsawaren dagiti bombero dagiti residente a napupok kadagiti akinngato a kadsaaran dagiti pasdek.
Nangrugi ti uram kadagiti pasdek idi rabii ti Nobiembre 26, ngem agingga ita, makibakbakal pay laeng dagiti bombero iti apuy.
Iti sabali a bangir, inarestar dagiti autoridad ti tallo nga opisial ti construction company iti maatap a panangpapatay iti adu (manslaughter) babaen ti panangusarda kadagiti nalaka a mapuoran a materiales -- a pakairamanan ti kawayan nga scaffolding ken polystyrene boards - a nai-report a nangpapardas iti panagwaras ti apuy. (Raymund Antonio/Manila Bulletin//Lito Hilidon/Bannawag)
