Sumupiat dagiti prosecutor ti gobierno iti kiddaw ni Senador Jose “Jinggoy” Estrada iti Sandiganbayan a mapalubosan koma nga agbiahe iti ballasiw-taaw manipud itoy a Disiembre agingga iti Enero inton umay a tawen.
Iti hearing a naangay idi Nobiembre 27, kinuna dagiti abogado ni Estrada a panggep ti senador nga agbiahe iti Japan manipud Disiembre 26 agingga iti 31, 2025 ken iti Norway, Iceland, ken Austria manipud Enero 5 agingga iti 15, 2026.
Ngem inlawlawag ti prosekusion iti Sandiganbayan a malaksid iti nakapila a kaso ni Estrada a graft, maysa ti senador kadagiti maim-imbestigaran mainaig kadagiti naanomalia a flood control project ti gobierno, isu nga agannad koma ti korte iti panangipaayda iti pammalubos iti panagbiahe ni Estrada.
Binilin ni Associate Justice Gener Gito dagiti abogado ni Estrada nga isubmiterda dagiti kasapulan a dokumento a mangpaneknek iti kiddaw ni Estrada a panagbiahe, kas iti itinerary, hotel booking, ken travel authority.
Senado, pinasingkedanna ti ₱6.793-trilion a nailian a badiet para 2026
Nupay naabsuelto ni Estrada iti kasona a plunder mainaig iti PDAF idi 2004, adda pay 11 a kasona a pananglabsing iti Section 3(e) of R.A. 3019 wenno ti Anti-Graft and Corrupt Practices Act gapu iti mapapati a pannakaalana iti ₱183,793,750 manipud iti PDAF gapu iti panangyendorsona kadagiti palso a non-government organizations (NGO) a kukua ni Janet Lim Napoles idi 2004. (Czarina Nicole Ong Ki/Manila Bulletin//Lito Hilidon/Bannawag)
