Sisasagana dagiti kameng ti Philippine National Police (PNP) a mangbantay kadagiti rali kontra iti panagkunniber a maaangay inton Nobiembre 30, ket i-deploy-da ti aganay a 15,000 a polis iti Metro Manila tapno bantayanda ti panagtitipon ti rinibu a tattao a kontra iti panagkunniber.
Segun ken ni acting PNP chief Police Lt. Gen. Jose Melencio Nartatez Jr., bantayan dagiti polis dagiti kangrunaan a lugar para iti “Baha sa Luneta 2.0” a maangay iti Manila ken ti “Trillion Peso March” a maangay iti People Power Monument iti Quezon City.
Bantayan pay ti PNP ti dadduma pay a lugar a patienda a paguummongan dagiti tao: ti aglawlaw ti Malacañan Palace; EDSA Shrine, ti Kamara iti Quezon City; ti Senado iti Pasay City, ken iti opisina ti Independent Commission for Infrastructure (ICI) iti Taguig City.
Buklen dagiti mai-deploy a polis ti 8,800 manipud iti National Capital Region Police Office (NCRPO) idinto nga 6,200 ti aggapu iti Special Action Force (SAF) ken kadagiti regional police offices.
Senado, pinasingkedanna ti ₱6.793-trilion a nailian a badiet para 2026
Kinuna ni Nartatez a namnamaenda nga adu ti tumabuno kadagiti nadumaduma nga aktibidad iti nadumaduma a lugar isu a masapul a sisasaganada nga agresponde iti ania man a pananglabsing iti linteg.
Inlawlawag ni Nartatez a ti kaadda dagiti polis ket dina kayat a sawen ti agresibo a tignay, no di ket agtalinaed ti bilinda nga ipakat dagiti polis ti maximum tolerance.
Sagsaganaan met ti PNP ti posibilidad a panangsinga wenno panangserrek dagiti grupo nga agtarigagay a mangriribuk iti natalna a panggep dagiti rali, kas iti napasamak iti naangay a rali idi Septiembre 21 iti Manila, nangruna iti Mendiola.
Iti sabali a bangir, binalakadan ti PNP dagiti nangorganisar iti rali a bantayanda koma ti bukodda a grupo tapno saan ida a mastrek dagiti grupo nga agpanggep a mangtippuog iti gobierno, a mangpataud iti riribuk. (Martin Sadongdong/Manila Bulletin//Lito Hilidon/Bannawag)
