Sinupiat ni Bicol Saro Party-list Rep. Terry Ridon ti Department of Trade and Industry (DTI) ita nga aldaw, Nobiembre 28, gapu iti sinaoda nga umdas ti ₱500 a badiet para iti noche buena ti Filipino.
"Iti ania ngata a lubong nga umdas ti ₱500 para iti noche buena ti pamilia ti Filipino?" kinuna ni Ridon a daulo ti Committee on Public Accounts ti Kamara.
Sinungbatan ni Ridon ti sinao ni daulo ti DTI Cristina Roque nga umdas ti ₱500 a badiet tapno makagatang iti hamon, macaroni salad, spaghetti - a gagangay a sagana ti Filipino iti Noche buena -- segun iti kaadu ti mangan.
Segun ken ni Ridon, saan a daytoy ti umuna a panangipetteng ti DTI nga umdas ti ₱500 a badiet para iti noche buena ti gagangay a Filipino.
Senado, pinasingkedanna ti ₱6.793-trilion a nailian a badiet para 2026
"Ngem ammotayo no ania ti pudpudno a noche buena a maidasar iti pamilia a Filipino: adda spaghetti, adda keso, ket no maminsan, adda hamon no adda umdas a naurnong a kuarta para iti panangrambak iti Paskua," kuna ni Ridon.
Ngem kinuna ni Ridon a no kitaen ti agdama a presio ti magatgatang, uray ti simple nga spaghetti ken keso laeng, saanen a kabaelan a gatangen ti ₱500 laeng nangruna no adu ti kameng ti pamilia.
Kinuna pay ni Ridon nga awan met agibagbaga a masapul a ₱500 laeng ti badiet para iti noche buena, ta ti napatpateg kadagiti Filipino ket ti panangsigurado ti gobierno nga agtalinaed a nalaka ti presio dagiti magatang a rekado ken ramen para iti panangrambak iti Paskua. (Ellson Quismorio/Manila Bulletin//Lito Hilidon/Bannawag)
