Kinuna ti Department of Foreign Affairs (DFA) a natalgeden ti 63 a Pilipino manipud iti dakkel nga uram iti Tai Po, Hong Kong, idinto a maysa ti nasugatan, ken maysa pay ti mapukpukaw.
Segun iti statement ti DFA idi rabii ti Biernes, Nobiembre 28, "itultuloy ita ti Consulate General of the Philippines iti Hong Kong ti on-the-ground operations-na tapno biroken ken matulongan dagiti Filipino a naapektaran iti insidente ti uram iti Tai Po.
Kinompirmar dagiti mobile team ti Consulate General a naawanan pagnaedan dagiti 63 a Filipino gapu iti uram ken saanda nadangran, nupay maysa ti nasugatan ken agkasapulan iti medical assistance, ken maysa ti mapukpukaw pay laeng ket saan a makontak.
Adda pay 28 a nagan iti madama a maberberipikar, a kayatna a sawen a posible nga agnanaedda iti lugar a nauram ngem saan a naipadamag a mapukpukaw dagitoy nupay saan nga ammo ti yanda.
Dati a presidente Duterte, 'fit to participate' iti ICC, segun kadagiti medical expert
“Nairehistro ken nailistada nga agnanaed ken agtrabtrabaho iti Wang Fuk Court ngem awan ti report a mapukpukawda. Masapul laeng a siguraduenmi a talaga nga awandan iti lugar idi simged ti uram,” kinuna ni DFA spokesperson Angelica Escalona.
Segun pay iti statement ti DFA, madama a berberipikaren ti Consulate General iti Hong Kong ti kasasaad ken no yan ti 91 a Filipino a nairehistro iti Wang Fuk Court.
“Mabalin a nagbaliw iti employer ti dadduma kadagitoy a worker, immakar iti sabali a lugar, wenno nagawiden iti Filipinas sakbay pay ti uram,” innayonna.
Immaboten iti 128 ti bilang dagiti natay iti uram a nangpuor iti Wang Fuk Court idinto a ginasut pay laeng ti mapukpukaw. (Raymund Antonio/MANILA BULLETIN)
