Ited ti Presidential Communications Office (PCO) ti sibubukel a kooperasionda iti iwayat ti Senado nga imbestigasion mainaig iti nagapuananda, nupay impeksada ti pannakadismayada kadagiti alegasion nga agiwarwaras ti ahensia iti saan a napatalgedan ken makaallilaw nga impormasion.
Daytoy ti kinuna ni Undersecretary ti PCO Claire Castro kalpasan nga impila ni Senador Robin Padilla ti maysa a Senate resolution mainaig iti saan a panagkikinnaawatan iti PCO maipanggep kadagiti panangiruarda iti mensahe ken saan a panagpapada iti maipaulog nga opisial a waragawag.
Iti press briefing, kinuna ni Castro nga awatenna ti resolusion nga impila ni Padilla ken ilawlawagda kadagiti mammanday-linteg no kasanoda nga iwaragawag dagiti programa ti gobierno iti publiko.
Nupay kasta, kuna ni Castro a naupay isuna iti konklusion ni Padilla a maibusor iti PCO, a mangipabpablaakda kano iti saan a napatalgedan, saan nga agpapada, ken impormasion a propaganda a nangpapataud iti pannakariro ti publiko iti polisia ti gobierno. (Argyll Cyrus Geducos/Manila Bulletin//Lito Hilidon/Bannawag)
