Inlaksid ti grupo dagiti dati retirado a heneral, agraman dati a hepe ti polis ken daulo ti militar, ti yaw-awag dagiti dadduma a kakaduada a panangibabawi ti Armed Forces of the Philippines (AFP) iti suportada iti administrasion ni Presidente Marcos Jr.
Impaganetget ti Association of Generals and Flag Officers (AGFO) a dagiti panagpanggep a panangtippuog iti gobierno, agraman ti panangallukoy dagiti dadduma a retirado a heneral kadagiti aktibo iti serbisio a mangisayangkatda koma iti kudeta, ket nalawag a panaglabsing iti Konstitusion.
Iti biang ti AGFO, nalawag ti sasawen ti Konstitusion a rumbeng a saan a makiraman ti militar iti partisan politics ken awan ti kameng ti militar a makibiang, direkta wenno saan a direkta, iti ania man nga aramid ti partisan politics, malaksid no agbotos.
Kinondenar ti AGFO ti panangalllukoy a makibiang ti AFP kadagiti ar-aramid a maikaniwas iti linteg.
Marcos, Robredo, nagsarak iti Naga city
Nagyaman met ti AFP kadagiti retirado a heneral iti panangsuportarda iti natibker a takder ti militar nga agtalinaedda nga apolitical babaen ti panangilaksidda kadagiti panangalllukoy a tippuogendan ti administrasion ni Marcos. (Aaron Recuenco/Manila Bulletin//Lito Hilidon/Bannawag)
