Natalna ti pakabuklan dagiti rali kontra iti panagkunniber a naangay iti Metro Manila, segun iti Philippine National Police (PNP), idi Domingo (Nobiembre 30) iti rabii, kalpasan a nagawid ti kaaduan a nakipaset iti rali, nangruna iti People Power Monument iti Quezon City.
Dinayaw ni acting PNP chief, Lt. Gen. Jose Melencio Nartatez, Jr. dagiti amin a commander ken polis a nagtalinaed iti nakaibaonanda sipud iti Sabado (Nobiembre 29), agingga iti panagdalusda idi Domingo ti rabii.
Naipan iti alert status dagiti polis sipud idi Nobiembre 28, idinto a nasurok a 16,000 ti nagbantay iti programa ti Trillion Peso March iti Metro Manila.
Kinuna ni Nartatez nga adda nagbanagan dagiti trabaho ken sakripisio ti polisia, ta nairingpas dagiti rali iti Metro Manila a natalna.
Mapukpukaw a nobia, nasarakan iti Pangasinan
Nupay adda sumagmamano a tao a nagpanggep a nangriribuk iti programa, kinuna ni Nartatez a nataming met laeng a dagus dagitoy gapu iti napardas a panagtignay dagiti polis.
Innayon ni Nartatez a ti napasamak iti daytoy a rali ti mangipakita a mabalin nga agtipon ti natalna a panagtataripnong ken epektibo a panangipatungpal iti linteg. (Aaron Recuenco/Manila Bulletin//Lito Hilidon/Bannawag)
