Dinusa dagiti kameng ti Kamara ni Cavite 4th district Rep. Francisco "Kiko" Barzaga gapu kadagiti inar-aramidna a di nainkalintegan ken di maikanatad para iti maysa a kongresman
Inanamongan dagiti 249 a kongresman (5 ti "No"; 11 ti saan a nagbotos) idi Disiembre 1 ti pannakaipataw ti dusa nga 60 nga aldaw a pannakasuspenso nga awan bayadna.
Ni 4Ps Party-list Rep. JC Abalos, daulo ti House Committee on Ethics and Privileges, ti nangirekomendar iti daytoy iti plenario mainaig iti ethics case nga impila dagiti 29 a kongresman idi Septiembre.
Impila dagiti amin a kameng ti National Unity Party (NUP) ti reklamo, nga indauluan ni Deputy Speaker Antipolo City 1st district Rep. Ronaldo "Ronnie" Puno. Ti NUP ti dati a partido ni Barzaga.
Mapukpukaw a nobia, nasarakan iti Pangasinan
Segun iti pangngeddeng ti komite, nagbasol ni Barzaga iti disorderly behavior, a panaglabsing iti Section 141-A rule 20 iti paglintegan ti Kamara; ti 4C ti RA (Republic Act) No.6713 wenno ti Code of Conduct and Ethical Standards for Public Officials and Employees; ken gapu iti panangaramidna kadagiti di maikanatad a kababalin ti maysa a kameng ti Kamara.
Binallaagan pay ti komite ni Barzaga a no ulitenna pay dagiti inaramidna, nadagdagsenton ti dusana.
"Awatek a sipupuso ti pangngeddeng ti komite," kinuna ni Barzaga sakbay pay a marugian ti panagbobotosda.
Maipatungpal a dagus ti suspension order kontra ken ni Barzaga, ngem saan a nairaman ditoy dagiti empleado ti opisinana isu nga agtrabaho ken agsueldoda latta. (Ellson Quismorio/Manila Bulletin//Lito Hilidon/Bannawag)
