Nagsubli iti The Hague, the Netherlands ni Bise Presidente Sara Duterte kalpasan a mapaayda iti apelarda nga interim release ni dati a presidente Rodrigo Duterte iti Appeals Chamber ti International Criminal Court (ICC).
Iti pannakiuman ni Sara kadagiti pasurotda iti The Hague idi Disiembre 1, kinunana a naawat ii amana dagiti mensahe ken karkararagda.
"Napintas ti saritaanmi iti politika. Adda bassit nagsaritaanmi mainaig iti pamilia, ngem kaaduanna iti politika ken dagiti mapaspasamak iti pagilian," kuna ti bise presidente.
Saan a pinatgan ti Appeals Chamber ti interim release ti dati a presidente idi Nobiembre 28.
Senado, pinasingkedanna ti ₱6.793-trilion a nailian a badiet para 2026
Iti sabali a bangir, ur-urayen ti depensa ti resulta ti apelarda mainaig iti hurisdiksion ti ICC iti kaso ni Duterte, ken ti medical assessment daytoy, no kabaelanna met laeng ti sumango iti pannakausig (trial).
Manamnama nga idatag dagiti eksperto ti medical report inton Disiembre 5.
Inkalintegan dagiti abogado ni Duterte a saanna a kabaelan ti sumango iti pannakausig, a nangitunda iti pannakaitantan ti confirmation of charges hearing idi Septiembre 23.
Adda pay naipila a petition to adjourn all legal proceedings gapu iti dinakamatda a medikal a kasasaad ni Duterte nga impila ti depensa. (Raymund Antonio/Manila Bulletin//Lito Hilidon/Bannawag)
