Insingasing ni Senate President Pro Tempore Panfilo "Ping" Lacson idi Disiembre 2 ti maysa a probision iti 2026 budget a mangiparit iti ania man a politkal a pannakiraman iti pannakaiwaras dagiti pinansial a tulong, tapno maliklikan ti panangabuso dagiti politiko iti pannakaiwaras ti ayuda.
Iti period of amendments ti singasing a 2026 national budget, insingasing ni Lacson ti maysa a probision tapno di matulawan ti politika dagiti social welfare program ti gobierno.
Segun iti singasing ni Lacson, maparitan dagiti agdama nga opisial, kandidato, politiko, wennno asino man a mangibagi kadakuada a tumabuno, makipaset, mangimpluensia wenno makiraman iti pannakaiwayat wenno pannakaiwaras ti ania man a tulong pinansial, agraman ti political signage, branding, paraphernalia, wenno aktibidad a maiparang wenno maaramid iti lugar a pakaiwarasan ti ayuda.
Insingasing ni Lacson a madusa ti asino man nga empleado ti DSWD a mangipalubos iti pannakiraman ti politiko, mayannatup iti mayaplikar a paglintegan ti civil service. (Dhel Nazario/Manila Bulletin//Lito Hilidon/Bannawag)
