Impalgak ti Second Congressional Commission on Education (EDCOM 2) a 85 a porsiento dagiti adalan iti Grado 1 agingga 3 ti marigatan nga agbasa, idinto a 15 a porsiento laeng ti makabael nga agbasa kas maitutop iti gradoda, ket inyunay-unayda a kasapulan ti napardas a solusion kas iti ad-adu a basaen, pannakapasayaat iti kabaelan ti mannursuro, ken pannakiraman dagiti nagannak -- tapno mataming ti giwang iti edukasion.
Iti umuna nga aldaw ti National Literacy Conference a naangay iti Siudad ti Quezon idi Disiembre 2, dinakamat ni EDCOM 2 Executive Director Karol Mark Yee ti sukisok a nangipakita a 85 a porsiento dagiti adalan iti Grad 1 agingga 3 ti marigatan nga agbasa, ket serioso a parikut daytoy iti edukasion ti Filipinas.
Imparang ni Yee ti panangtingiting a naiwayat idi Hulio a 15 a porsiento laeng dagiti adalan ti makabael nga agbasa a maitutop iti gradoda.
Kinuna ni Yee a nasaknap daytoy a parikut, ket ti kaaduanna a naapektaran dagiti pagadalan iti Rehion VIII, IX, ken XII.
Di maideklarar a SALN, umdas a pakaikkatan ti impeachable official
Segun ken ni Yee, kangrunaan a makatubeng iti kinasayud nga agbasa ti kinakurang dagiti materiales a basaen, kinakurang ti pannakasanay dagiti mannursuro, ken nakedngan a pannakiraman ti nagannak ken ti komunidad.
Impaganetget ti EDCOM 2 a kasapulan unay dagiti ubbing ti maaddaan kadagiti libro, nalaing a mannursuro a mangipaay iti epektibo a panangisuro iti panagbasa, ken dadduma pay a wagas tapno mairaman dagiti nagannak.
Innayon ni Yee a kasapulan unay dagiti polisia a mangsuportar iti daytoy, nayon a pondo, ken naan-anay a pannakiraman ti komunidad tapno saan a maudi dagiti adalan ken mataming ti giwang ti edukason iti pagilian. (Merlina Hernando-Malipot/Manila Bulletin//Lito Hilidon/Bannawag)
