Kiniddaw ti Office of the Solicitor General (OSG) iti Korte Suprema (SC) a palubosanda koma ti OSG nga agpaay a kas abogado ti gobierno mainaig iti petision a nangkarit iti pannakaarestar ken pannakayawat ni dati a presidente Rodrigo Duterte iti International Criminal Court (ICC) idi Marso 11.

Ti OSG ti pannakaabogado ti pagilian.

Iti dokumento nga impila ti OSG iti SC idi Disiembre 1, dinakamatda ni Solicitor General Darlene Marie B. Berberabe nga agpaay nga abogado ti gobierno.

Malaksid iti daytoy, kiniddaw ni Solicitor General Berberabe iti SC a mawaswas koma ti kiddaw ti petision a pannakaipaulog ti temporary restraining order (TRO).

Nasional

Mapukpukaw a nobia, nasarakan iti Pangasinan

Da Duterte ken Sen. Ronald Dela Rosa ti nangikamang iti petision iti SC ket nailista a GR No. 278747.

Idi Marso 12, saan a pinatgan ti SC ti kiddaw da Duterte a TRO, ngem binilinna ketdi dagiti respondent a mangidatag iti sungbatda.

Ngem idi Marso 24, nag-inhibit ni Menardo Guevarra (a solicitor general idi) ken nagkedked a makiraman iti petision, ket kinunana nga awan ti obligasion ti Filipinas a makitinnulong iti ICC, wenno iti ania man a banag nga aggapu iti ICC, kas epekto ti ipapanaw ti Filipinas iti Rome Statute idi 2019. Inaprobaran ti SC daytoy idi Abril 2.

Iti kaudian nga impila ti OSG a reentry of appearance, kinuna ni Solicitor General Berberabe iti SC nga isun ti agpaay a kas abogado ti gobierno mainaig iti petision da Duterte ken Dela Rosa.

Nairaman a kas respondent iti petision da dati nga executive secretary Lucas Bersamin, DILG Secretary Juan Victor Remulla, dati a Philippine National Police (PNP) Chief Gen. Rommel Marbin, dati a PNP-Criminal Investigation and Detection Group (CID) Director Gen. Nicolas Torre III, dati a Solicitor General Guevarra, DFA Secretary Enrique Manalo, Armed Forces of the Philippines (AFP) Chief of Staff Romeo Brawner Jr., Executive Director of the Philippine Center on Transnational Crime (PCTC) Undersecretary Lt. Gen. Antonio Alcantara, Capt. Johnny Gulla, ken ti Bureau of Immigration (BI).

Saan pay nga ammo no tamingen daytoy ti SC iti maangay a full court session-da ita nga aldaw, Disiembre 3. (Rey G. Panaligan/Manila Bulletin//Lito Hilidon/Bannawag)