Aglusulos ni Independent Commission for Infrastructure (ICI) Commissioner Rogelio Singson iti puestona inton Disiembre 15, gapu iti kunana a "makapa-stress a trabaho" iti komision.
Impakaammo daytoy ti chairman ti ICI a ni retired Supreme Court associate justice Andres Reyes Jr. ita a Mierkoles, Disiembre 3, maysa nga aldaw kalpasan a maipadamag nga agikkat iti puestona ni Singson, dati a hepe ti Department of Public Works and Highways (DPWH).
"Kayatko nga umuna nga ipakaammo ti panaglusulos ni Secretary Babes Singson wenno Commissioner Singson nga agepektibo inton Disiembre 15, 2025, ngem mabalin pay a mayalud-od agingga iti Disiembre 31," kinuna ni Reyes.
"[Ti pangngeddengna ket] para pakaseknan ti salun-at ken kasta met a para iti seguridad, gapu ta saan a nairuam isuna iti kastoy a panagbiag," innayonna.
₱800 a nayon iti binulan a sueldo dagiti katulongan iti NCR, marugian inton Pebrero 7
Ni Singson ti maikadua a kameng ti ICI a naglusulos manipud idi nabukel ti komision idi napan a Septiembre. Immuna a nagikkat ti dati nga ICI special adviser a ni Baguio City Mayor Benjamin Magalong.
Iti laksid dagitoy a panaglusulos, iti baet ti panangbabalaw ti publiko iti panagkumit ti ICI iti transparency, pinasingkedan ni Reyes ti integridad ti ICI. (Joseph Pedrajas/MB)
