Nagkiddaw, iti maudi a gundaway, ni Commissioner ti Independent Commission for Infrastructure (ICI) Rogelio Singson ita nga aldaw, Disiembre 4, iti Kongreso, bayat ti panangipakaammona iti panaglusulosna a kameng ti ICI: mangipasa iti linteg a mangipasdek iti nabilbileg a komision.
Iti naangay a press conference kalpasan ti naipadamag a panaglusulosna, inyebkas ni Singson ti pannakaupayna, saan laeng nga iti limitado a bileg ti ICI no di ket pay panagkurang ti suporta manipud iti gobierno.
Kinuna ni Singson a daytoy ti makagapu a ti ICI ti pagdas-alan amin a pammabasol ken pammabalaw mainaig kadagiti panagkunniber iti flood control project.
Inyebkas ni Singson ti pannakaupayna gapu ta nabukel ti ICI babaen ti Executive Order (EO) No. 94 nga awan man laeng ti badietna.
Senado, pinasingkedanna ti ₱6.793-trilion a nailian a badiet para 2026
Kinuna ni Singson nga agingga ita, awan pay ti nagsueldo kadagiti nagboluntario a kameng ti ICI a nangrugi ti trabahoda idi Septiembre.
Malaksid iti kaawan ti badiet, kinuna ni Singson a saan nga umdas ti bileg ti ICI a mangpasungbat kadagiti nairaman kadagiti naanomalia a flood control project, ta awan met bilegda a mangipaulog iti subpoena kadagiti nairaman iti anomalia, awan ti bilegda a manglapped iti ipapanawda iti pagilian, awan ti karbenganda a mangarestar, ken awan karbenganda a mangusig iti asino man.
Kiniddaw ni Singson iti Kamara ken Senado a mangbukelda koma iti linteg a mangipasdek iti Independent People's Commission, tapno maikkan iti napigpigsa ken agwaywayas a komision nga addaan iti umno a bileg ken autoridad nga awan iti ICI. (Joseph Pedrajas/Manila Bulletin//Lito Hilidon/Bannawag)
