Raemen ti Malakanyang ti pangngeddeng ni Rogelio Singson a naglusulos kas maysa a commissioner ti Independent Commission for Infrastructure (ICI).
Iti maysa nga interbiu iti DZMM ita nga aldaw, Disiembre 4, kinuna ni Undersecretary ti Presidential Communications Office (PCO) Claire Castro ita nga aldaw a maawatanda no apay a naglusulos ni Singson, ta saan nga as-asi ket pudno a narigat ti inaldaw a trabahoda iti ICI.
Kinuna pay ni Castro a malaksid iti pakaseknan iti salun-at, mabalin nga ipagarup ni Singson a nalpasen ti trabahona iti ICI, ket mabalinen nga ibinglayna ti laingna iti DPWH, ita a nalpasen ti akemna iti ICI.
Innayon ni Castro a kayat ni Singson a tulongan ti DPWH a mangipatungpal iti master plan a saan a naipatungpal idi napalabas nga administrasion.
Retirado a heneral, nakemmeg gapu iti panangsugsog a mangtippuog iti gobierno
Iti laksid ti panaglusulos ni Singson, impasigurado ni Castro a makapagtrabaho latta a husto ti ICI, ngem inaklon ni Castro nga awan pay ti napagsasaritaanda a kasukat ni Singson.
Idi Disiembre 3, impakaammo ni ICI Chairman Andres Reyes Jr. ti panaglusulos ni Singson iti ICI, gapu iti "kinarikut ti trabaho" iti komision. (Betheena Unite/Manila Bulletin//Lito Hilidon/Bannawag)
