Saan a nasalakniban ti Presidential Commission on Good Government (PCGG) ti ₱581.3 a milion a nasamsam, naisuko, ken naalada a sanikua a nadadaelen ken inokuparanen dagiti informal settler agingga idi Disiembre 31, 2024.
Iti 2024 annual audit report ti Commission on Audit (COA), kinunada nga adda bileg ti PCGG a mangsamsam wenno mangtagikua iti ania man a pasdek wenno opisina a naipatakder gapu iti illegal a wagas.
Kalpasanna, dagiti naganar iti panangilako ti PCGG kadagiti sanikua ket masapul a maideposito iti National Treasury.
Segun iti COA, ₱23,521,721.69 ti nailatang a pondo ti PCGG para iti pannakasalaknib dagiti nasamsam, naisuko, ken naalada a sanikua.
Kasapulan ti natibker ken nainkalintegan a pagtaktakderan iti parikut iti WPS --NMC
Ngem kadagiti napalabas a tawen, nadlaw ti COA a ti pondo ti PCGG ket nabusbos para iti legal a serbisio, panangbayad iti buis, insurance, ken dadduma pay a babayadan, isu a bassiten ti pondo a matda para iti pannakasalaknib dagiti sanikua, ket agingga idi Disiembre 31, 2024, saanda unay a nasalakniban dagiti sanikua nga agbalor iti ₱581,334,453.79.
Natakuatan ti COA a dagiti dadduma a dagdaga ken sanikua ket nagbalayanen dagiti informal settler; saan a naidulin dagiti partuat iti arte ken mabalin a madadael wenno matakaw dagitoy.
Nupay inaklon ti PCGG a nakurang a badiet ti makagapu kadagitoy, kinuna ti COA a napasamak dagitoy gapu iti kaawan ti umisu a plano para iti panangipatungpalda iti programa.
Insingasing ti COA a masapul a mangaramid ti PCGG iti programa a buyogen ti komprehensibo a dokumentasion tapno masigurado a masalakniban dagiti sanikua a nasamsam, naisuko, ken naala ti PCGG. (Czarina Nicole Ong Ki/Manila Bulletin//Lito Hilidon/Bannawag)
