Inaprobaran ti Senado idi Disiembre 4 ti singasing a ₱6.793-trilion a nailian a badiet para iti 2026, iti maikadua a pannakaibasa daytoy.
Immosion ni Senate Majority Leader Juan Miguel “Migz” Zubiri ti pannakaiserra ti period of amendments ti House Bill No. 4058 nga adda iti sidong ti Committee Report No. 18.
Inaprobaran met ni Senate President Pro Tempore Panfilo “Ping” Lacson, a nangiwardas iti plenary session, ti mosion. Saan nga immanamong da Senate Minority Leader Alan Peter Cayetano ken Sen. Joel Villanueva.
Sakbay a naaprobaran ti 2026 national budget, imbinsabinsa ni Sen. Sherwin Gatchalian, daulo ti Senate Finance Committee, dagiti nabaliwan iti 2026 General Appropriations Bill (GAB).
Senado, pinasingkedanna ti ₱6.793-trilion a nailian a badiet para 2026
Kinuna ni Gatchalian a mairuar inton Sabado, Disiembre 6, ti kompleto a detalye, agraman ti dagiti line by line amendment, ken amin a kasapulan a dokumento, sakbay a maaprobaran ti badiet iti third reading.
Patien ni Gatchalian a nadalus ken awan ti red flag iti ipaulogda a 2026 national budget.
Iti maysa nga interbiu, impasigurado ni Senate President Vicente Sotto III nga awan ti reenacted budget inton 2026, ken nalawag a maimatangan ti publiko ti proseso ti pannakaanamong iti badiet. (Hannah L. Torregoza/Manila Bulletin//Lito Hilidon/Bannawag)
