Dinutokan ni Presidente Ferdinand Marcos Jr. ni Abogado Angelito Magno a kas acting director ti National Bureau of Investigation (NBI).
Inruar ti Malakanyang ita nga aldaw, Disiembre 5, ti kopia ti appointment paper ni Magno a pinirmaan ni Marcos idi Mierkoles (Disiembre 3).
Idi Oktubre, nadutokan ni Magno a kas officer in charge (OIC) kalpasan a naglusulos ni Jaime Santiago kas direktor ti NBI.
Tallon a dekada nga agpapaay ni Magno iti NBI, a nangrugi kas project worker idi 1991, sakbay a nagbalin nga special investigator, investigation agent, head agent, regional director, ken assistant director.
Mapukpukaw a nobia, nasarakan iti Pangasinan
Nagpaay pay ni Magno kas regional director iti Ilocos Region, Central Luzon, Calabarzon, ken Northern Mindanao.
Iti panagpaayna iti NBI, adun ti nagapuanan ni Magno a naririgat a mision, panangidaulo kadagiti operasion, agraman pannakakemmeg dagiti pugante.
Sumagmamano kadagiti nagapuanan ni Magno ti pannakasamsam ti ₱3.8 a bilion a balor ti illegal a droga a naduktalan iti Pampanga; ti naballigi a pannakataming ti Degamo-Teves murder case; ti pannakatippuog ti Socorro Bayanihan child exploitation network; ken ti pannakaimbestigar ti M/T Princess Empress oil spill. (Ruth Abbey Gita-Carlos/PNA//Lito Hilidon/Bannawag)
