Manipud iti Pasig City jail, nayakaren iti Correctional Institution for Women (CIW) iti Mandaluyong City ni dati a mayor ti Bamban, Tarlac Alice Leal Guo, idi Disiembre 5, a nakombiktaran gapu iti kaso a qualified human trafficking.
Nasentensiaan ni Guo idi Nobiembre 20 babaen ti pangngeddeng ni Pasig City Regional Trial Court (RTC) Judge Annilyn Medes-Cebelis.
Kadua ni Guo a nayakar iti CIW, ti pagbaludan nga imatmatonan ti Bureau of Corrections (BuCor), da Jaimielyn Santos Cruz ken Rachelle Joan Malonzo Carreon, kas imbilin ni Judge Medes-Cebelis.
Isuda, ken ti lima pay a naidarum, da Walter Wong Rong, Wang Weili, Wuli Dong, Nong Ding Chang, ken Lang Xu Po, ket nasentensiaan iti tungpal-biag a pannakaibalud ken nabilin nga agmulat iti P2 a milion.
Mapukpukaw a nobia, nasarakan iti Pangasinan
Kinuyog ida dagiti opisial ti Bureau of Jail Management and Penology (BJMP) nga idadauluan ni Chief Insp. Jean Olive Unciano, a warden ti Pasig City Jail Female Dormitory.
Kinuna ni CIW CT/Supt. Marjorie Ann Sanidad nga agdalan iti lima nga aldaw a quarantine da Guo, Cruz, ken Carreon iti RDC sakbay ti naan-anay a medical examination. (Czarina Nicole Ong Ki/Manila Bulletin//Lito Hilidon/Bannawag)
