Pimmusay ti maysa a 15-anios a balasitang kalpasan a naidungpar iti pinuon ti kayo ti motorsiklo a minanehona idi liniklikanna dagiti agpatpatrolia a polis iti Barangay Corocor, i Bacarra, Ilocos Norte idi rabii ti Huebes, Disiembre 4.
Kinuna ni Police Capt. Joseph Calderon, hepe ti polis ti Bacarra, nakita dagiti polis ti biktima ken ti kaduana a tinedier met laeng a nakamotorsiklo nga awananda iti helmet ken visibility vest.
Sineniasan ida dagiti polis nga agsardengda tapno mapagsaludsodan ida ngem nagdardarasda a pimmanaw. Kinamat ida dagiti polis ket nasarakanda ida iti kurba a paset ti kalsada a nadalupon iti asideg ti maysa a pinuon ti akasia.
Natay a dagus ti biktima iti lugar ken nagsagaba met ti dunor ti kaduana, a naitaray iti ospital.
Camalaniugan-Aparri Bridge, inaguraran ni Marcos
Segun iti Imbestigasion, naammuan a mapan mangala iti project-da dagiti biktima idi nakita ida dagiti polis.
Kinuna ni Calderon a kinamatda dagiti dua a menor de edad gapu ta ginandatda ti aglibas a nangpataud iti posibilidad a mabalin nga adda ilemlemmengda.
Innayonna a maawatanda ti ladingit ti pamilia ti biktima ngem inyunay-unayna nga ar-aramidenda laeng ti pagrebbenganda ken dida kayat a matay daytoy.
Impalagip ni Calderon kadagiti nagannak a saanda a palubosan dagiti annakda nga agmaneho iti ania man a klase ti lugan ken saanda a palubosan a rummuar iti rabii tapno malapdan dagiti kastoy nga aksidente. (Freddie Lazaro/MANILA BULLETIN)
