Winaswas ti Korte Suprema (SC), gapu iti nakaro a panangabuso iti diskresion, ti probision iti 2024 General Appropriations Act (GAA) a nangipalubos iti pannakayallatiw dagiti surok a pondo dagiti government-owned or controlled corporation (GOCC) iti National Treasury tapno maponduan dagiti unprogrammed appropriation iti GAA.
Iti pangngeddeng nga insurat ni Associate Justice Amy C. Lazaro-Javier, winaswas ti SC ti Special Provision 1(d), Chapter XLIII ti 2024 GAA, ken ti Circular No. 003-2024 ti Department of Finance (DOF) a nangibilin iti pannakayallatiw ti ₱89.9 a bilion a pondo ti Philippine Health Insurance Corporation (PhilHealth) iti National Treasury.
Gapu iti daytoy, binilin ti SC ti gobierno nga isublida ti ₱60 a bilion a nayakaren iti National Treasury ken isardengdan ti panangiyallatiwda iti natda a ₱29.9 a bilion.
Rinisut ti SC ti tallo a petision nga impila ti grupo ni dati a senador Aquilino Pimentel III, Bayan Muna Chairman Neri Colmenares, ken ti 1Sambayan Coalition.
Retirado a heneral, nakemmeg gapu iti panangsugsog a mangtippuog iti gobierno
Iti dokumento nga imbinglay ti Office of the Spokesperson ti SC, inikkatda ti Special Provision 1(d) ti 2024 GAA, ta awan pakainaigan daytoy iti gandat ti gakat a linteg, idinto a kuna ti Konstitusion nga amin a probision ti GAA ket mainaig iti panggep ti GAA tapno maliklikan ti panakasorpresa wenno panagkusit iti pannakabukel ti nailian a badiet.
Inlawlawag ti SC a saan a nakabasol ti Presidente iti nakaro a panangabuso iti pangngeddengna iti panangideklararna nga "urgent" ti House Bill No. 8980, a 2024 GAA itan, ket ti laeng Kongreso ti addaan bileg a mangpasingked iti kina-urgent daytoy.
Nupay kasta, saan a pinatgan ti SC ti kiddaw dagiti nagpetision a kitaenda no adda nakabasolan ti Sekretario ti DOF iti technical malversation wenno plunder, ta saan nga isu ti umno a lugar a mangtaming iti dayta a kaso.
Innayon ti SC a ti laeng rinisutda ket ti panangkitada no balido met laeng dagiti naipaulog a linteg ken no adda kaso a panangabuso iti kalintegan a mangikeddeng a nagtungpal iti panagsurok wenno kinaawan ti hurisdiksion. (Rey G. Panaligan/Manila Bulletin//Lito Hilidon/Bannawag)
