Naipila ti kaso a perjury, wenno panagulbod, kontra ken ni Sen. Rodante D. Marcoleta iti Office of the Ombudsman (OMB) idi Disiembre 5, mainaig iti naawatna a ₱112 a milion a pondo para iti kampania ngem saanna nga indeklarar iti Statement of Contributions and Expenditures (SOCE).
Da Danilo A. Arao ti grupo a Kontra Daya ken dagiti kameng ti Advocates of Public Interest Law nga imbagian dagiti abogadoda a da Alexander L. Lacson ken Dino S. De Leon, ti nangipila iti kaso.
Maibasar daytoy iti inwaragawag ni Marcoleta nga adda naawatna a ₱112 a milion a donasion para iti kampaniana idi Mayo 2025 senatorial election, ngem inadmitirna a saanna nga indeklarar daytoy iti SOCE gapu iti kiddaw ti nagdonar a saan koma a maipablaak ti naganna.
Segun kadagiti nangidarum, saan a mabalin a pagpambar ni Marcoleta a dina ammo ti linteg idinto a maysa nga abogado daytoy, ket impaganetgetda a dagiti sinao ni Marcoleta iti publiko ket maysa a direkta ken nabatad a pammaneknek nga adda dagiti elemento ti perjury ken maiparbeng ti pannakausigna.
Mapukpukaw a nobia, nasarakan iti Pangasinan
Innayon dagiti nangidarum nga ammo ni Marcoleta ti kinapateg dagitoy a panangideklarar, kas maysa nga abogado ken nabayagen nga opisial ti gobierno, ammona a dagiti kontribusion ken nagan dagiti nangted ti donasion ket masapul a sinapataanna a sipupudno a naiparang dagitoy.
Awan pay ti komento ni Marcoleta agingga iti pannakasursurat daytoy a damag. (Czarina Nicole Ong Ki/Manila Bulletin//Lito Hilidon/Bannawag)
