Kiniddaw ti Office of the Prosecutor (OP) ken ti Office of the Public Counsel for Victims (OPCV) iti Appeals Chamber ti International Criminal Court (ICC) a waswasenda koma ti apelar ni dati a presidente Rodrigo Duterte iti kinuestionarda a pangngeddeng ti pre-trial chamber (PTC) a nangipasingked iti hurisdiksion ti ICC iti kaso ni Duterte.
Iti 22 a panid a dokumento a pinirmaan ni ICC Deputy Prosecutor Mame Mandiaye Niang, kinuna ti OP a masapul a waswasen ti Appeals Chamber ti apelar ni Duterte gapu ta saanda a naiparang ti biddut iti pangngeddeng ti PTC.
Inkalintegan ti OP na adda karbengan ti ICC a mangipakat iti hurisdiksionda kadagiti krimen a mapapati a naaramid idi kameng pay ti ICC ti Filipinas, gapu ta rinugianen ti Prosecution ti preliminary investigation sakbay pay nga impakaammo ti Filipinas ti isisinana wenno sakbay pay a nagbalin nga epektibo ti isisina ti Filipinas iti ICC.
Impakaammo ti Filipinas ti gandatna nga umikkaten iti ICC idi Marso 2018, makabulan kalpasan a marugian ti preliminary examination idi Pebrero 2018. Nagbalin nga epektibo ti isisina ti Filipinas iti ICC idi Marso 2019.
Senado, pinasingkedanna ti ₱6.793-trilion a nailian a badiet para 2026
Idi Oktubre 23, pinasingkedan ti Pre-Trial Chamber I ti ICC nga adda hurisdiksionda iti kaso ni Duterte, ket nangipila dagiti abogado ti depensa iti Notice of Appeal idi Oktubre 28 ken Appeal Brief idi Nobiembre 14. (Raymund Antonio/Manila Bulletin//Lito Hilidon/Bannawag)
