Kaso a plunder ken malversation of public funds ti mabalin nga ipila a maibusor ken ni dati a senador Ramon "Bong" Revilla Jr. mainaig kadagiti anomalia iti flood control project.
Daytoy ti imbatad ni Ombudsman Jesus Crispin Remulla iti maysa nga interbiu iti ANC, ket kunana a mabalin a maiditene ni Revilla inton umay a lawas.
Segun ken ni Remulla, malaksid ken ni Revilla, adda pay opisial ti gobierno a maiditene gapu iti nai-report a pannakipasetda kadagiti naanomalia a flood control project.
Iti panagtestimonia ni dati nga undersecretary ti Department of Public Works and Highways (DPWH) Roberto Bernardo itay kallabes, kunana a nagideliber isuna iti ₱125 a milion iti balay ni Revilla idi Disiembre 2024.
Di maideklarar a SALN, umdas a pakaikkatan ti impeachable official
Segun ken ni Bernardo, naikabil dagiti kuarta iti innem a cardboard box, nga aglaon iti ₱20 a milion ti maysa kahon.
Innayon ni Bernardo a ₱250 a milion ti indeliber ti katulonganna iti pagtaengan met laeng ni Revilla sakbay ti 2025 elections.
Inlibak ni Revilla dagitoy nga alegasion ni Bernardo. (Czarina Nicole Ong Ki/Manila Bulletin//Lito Hilidon/Bannawag)
