Saan pay a nalipatan ti Kamara ti kaso nga impeachment kontra ken ni Bise Presidente Sara Duterte, no di ket ur-urayenda laeng ti maudi a pangngeddeng ti Korte Suprema (SC) mainaig iti daytoy.
Daytoy ti kinuna ni Bicol Saro Party-list Rep. Terry Ridon idi Lunes, Disiembre 8, iti pananggutigotna iti SC a mangipaulogen iti desision iti motion for reconsideration (MR) nga impila ti Kamara mainaig iti impeachment complaint kontra ken ni Duterte nga impaulog ti maika-19 a Kongreso.
Naidatag ti impeachment complaint iti Senado idi Pebrero 5, 2025, ngem indeklarar ti SC nga "unconstitusional" daytoy idi Hulio gapu iti pananglabsing iti one-year bar rule.
Segun ken ni Ridon, a daulo ti House Committee on Public Accounts, no anamongan ti SC ti motion for reconsideration ti Kamara, maituloyen ti impeachment trial ni Duterte iti Senado; ngem no saan nga anamongan ti SC ti Kamara, maipila ti baro nga impeachment complaint kontra iti bise presidente inton Pebrero 2026, kas maitunos iti baro a pagaladagan ti SC iti impeachment.
Senado, pinasingkedanna ti ₱6.793-trilion a nailian a badiet para 2026
Impaganetget ni Ridon a naibasar iti kinapudno, ebidensia, ken prinsipio ti proseso ti impeachment.
Innayon ni Ridon a tungpalen ti Kamara ti annongenda a mangisayangkat iti impeachment a maibusor iti asino man ken amin nga impeachable officers, no la ketdi maidatag kadakuada dagiti verified impeachment complaint. (Ellson Quismorio/Manila Bulletin//Lito Hilidon/Bannawag)
