Inaprobaran ti Department of Justice (DOJ) idi Martes, Disiembre 9, ti pannakaipila kadagiti korte iti kaso a kriminal kontra ken ni negosiante Charlie “Atong” Ang ken 21 pay a tattao gapu iti mapapati a pannakairamanda iti pannakapukpukaw dagiti “sabungeros” wenno mammallot.
Iti maysa a statement, kinuna ti DOJ a nangisayangkat ti panel of prosecutors-na iti preliminary investigation kadagiti consolidated complaint ket nakasarakda iti prima facie evidence nga addaan iti nainkalintegan a kinasigurado ti pannakakombiktar tapno maidarum ni Ang ken dagiti kaduana nga akusado.
Segun iti DOJ, “agdagup iti 26 nga impormasion ti maipila kadagiti maitutop a korte ti linteg para iti pannakaisayangkat ti bista.”
Maipila dagiti kaso kadagiti regional trial courts (RTC) iti Lipa City iti Batangas, ken iti Sta. Cruz ken San Pablo City iti Laguna.
Retirado a heneral, nakemmeg gapu iti panangsugsog a mangtippuog iti gobierno
Saan nga imbaga ti DOJ no asino kada Ang ken dagiti kaduana nga akusado ti maisaklang kadagiti tallo a sanga ti RTC iti Batangas ken Laguna.
Kinuna ti DOJ a maidarum ni Ang ken 21 pay a tattao iti 10 a kaso ti kidnapping with homicide.
Nabigbig dagiti kaduana a da Police Lt. Col. Ryan Jay Orapa, Rogelio Tedoso Borican Jr., Rodelo Anig-ig, Mark Carlo Zabala, Ronquillo Anding, Police Senior Master Sergeant (PSMS) Joey Natanauan Encarnacion, Police Executive Master Sergeant (PEMS) Aaron Ezrah Lagahit Cabillan, Police Master Sergeant (PMSG) Michael Jaictin Claveria, PSMS Mark Anthony Aguilo Manrique, PSMS Anderson Orozco Abary, Police Staff Sergeant (PSSG) Edmon Hernandez Munoz, PSSG Alfredo Uy Andres, Police Maj. Philip Almedilla, Police Lt. Henry Sasaluya, Police Chief Master Sergeant (PCMS) Arturo Dela Cruz, PSMS Farvy Opalla Dela Cruz, Police Cpl. Angel Joseph Martin, Jezrel Lazarte Mahilum, Emman Cauda Falle, Julious Tagalog Gumulon, ken PMSG Renan Lagrosa Fulgencio.
Kinuna ti DOJ a maidarum pay ni Ang ken da Oraga, Claveria, Anig-ig, Borican, Almedilla, Encarnacion, ken Cabillan.iti 16 a kaso ti kidnapping with serious illegal detention.
Saan a nairaman kadagiti maidarum ni aktres Gretchen Barretto, a maysa kadagiti nainaganan a respondent kadagiti reklamo a naipila iti DOJ. (Jeffrey Damicog/MB)
