Impalgak ni Ombudsman Jesus Crispin Remulla ti gandatna a mangbukel iti Office of Ombudsman Marshal a mangipatungpal kadagiti cyber warrant, mangsalaknib kadagiti ebidensia, mangipatungpal kadagiti pammilin, mangsalaknib kadagiti imbestigador, ken mangsigurado nga awan ti mangsinga iti panagtulid ti hustisia.
Iti panagbitlana iti 2025 Sikhay Laban sa Korapsyon (SiLaK) a naangay iti Pasig City idi Disiembre 9, kinuna ni Remulla a ti pannakaipasdek ti Ombudsman Marshal ket nabayagen a kasapulan a reporma tapno masigurado ti panagbalin nga aktibo iti panangtaming iti panagkunniber.
Segun ken ni Remulla, ti Ombudsman Marshal ti agserbi a moderno a puersa a mangipatungpal iti linteg -- nasaririt, disiplinado, ken saan nga agbuteng -- tapno sarangtenda ti panagkunniber.
Kinuna ni Remulla a babaen ti tulong ti Philippine National Police (PNP), Department of Justice (DOJ), Department of National Defense (DND), Department of Information Communication and Technology (DICT), Anti-Money Laundering Council (AMLC), ken ti Sandiganbayan, kayat ti OMB ti mangipasdek iti natibker ken naannayas a pannakiasmang iti pannakaipatungpal ti linteg.
Mapukpukaw a nobia, nasarakan iti Pangasinan
Kabayatanna, ti Korte Suprema ket addaan bukodna nga Office of Judiciary Marshal (OJM) a nabukel idi 2022 babaen ti Republic Act No. 11691.
Ti OJM ti mangipapaay iti seguridad, kinatalged, ken salaknib kadagiti kameng ti hudikatura, opisial, ken empleado, ken dagiti sanikua ti amin a korte iti pagilian, kasta met ti kinasin-aw ti trabaho dagiti korte.
Ti OJM -- nga idadauluan ni retired police general Manuel R. Gaerlan -- ket addaan karbengan nga agimbestigar kadagiti krimen kontra kadagiti kameng ti hudikatura, agraman ti alegasion ti panagkunniber iti sistema ti hudikatura. (Czarina Nicole Ong Ki/Manila Bulletin//Lito Hilidon/Bannawag)
