Boluntario a simmuko ni kontractor a Cezarah “Sarah” Discaya iti National Bureau of Investigation (NBI) idi bigat ti Martes, Disiembre 9.
Pinasingkedan ni Abogado Cornelio Samaniego III, pannakangiwat ti Discaya, ti isusuko ni Discaya.
Kinuna ni Samaniego a kadua ni Discaya ti abogadona idi napan iti headquarters ti NBI iti Siudad ti Pasay.
Insuko ni Discaya ti bagbagina kalpasan nga impakdaar ni Presidente Marcos Jr. a mabalin a maarestar ti kontraktor ita a lawas apaman a maipaulog ti arrest warrant kontra kenkuana.
Dati a presidente Duterte, 'fit to participate' iti ICC, segun kadagiti medical expert
Sangsanguen ni Discaya dagiti kaso nga impila ti Office of the Ombudsman (OMB) iti saklang ti Digos City regional trial court a mainaig iti ₱96.5 a milion a “ghost” infrastructure project iti Davao Occidental idi 2022.
Saan a mapiansaan dagiti darum a graft ken malversation of public funds through falsification of public documents.
Dagiti dadduma pay a naakusaran kadagiti kaso ket dagiti opisial ti Department of Public Works and Highways (DPWH) iti Davao Occidental District Engineering Office nga idauluan daDistrict Engineer Rodrigo C. Larete ken Assistant District Engineer Michael P. Awa, ken sumagmamano a section chiefs, project engineers, ken inspectors.
Malaksid ken ni Sarah Discaya, indarum pay ti OMB ni Ma. Roma Angelin Rimando ti St. Timothy Construction Corporation.
Iti panangipilada iti kaso iti korte, kinuna ti OMB a nagkokomplot dagiti akusado tapno mairuar ti ₱96.5 a milion a para iti mapapati a pannakaaramid ti revetment project iti Barangay Culaman, Jose Abad Santos, Davao Occidental.
Kuna ti OMB a maibatay iti official inspection ken witness accounts, saan a pulos a naaramid ti nasao a proyekto.
Intudo pay ti OMB a nupay awan ti aktual a konstruksion, kaskasdi a pinaneknekan ti akusado a nalpasen ti proyekto. (Jeffrey Damicog/MANILA BULLETIN)
