Panggep ti Committee on Suffrage and Electoral Reforms ti Kamara a rugian inton Enero 13, 2026 ti preliminary hearing maipanggep iti singasing nga Anti-Political Dynasty Bill -- maysa kadagiti linteg a nabayagen a maidardarirag iti historia ti Kongreso.
Daytoy ti impalgak ni Lanao del Sur 1st district Rep. Zia Alonto Adiong a daulo ti komite, iti maysa a press conference idi Disiembre 10.
Segun ken ni Adiong, adu ti a singasing a linteg a mangiparit iti political dynasty ti naidatag iti komitena sipud nangrugi ti maika-20 a Kongreso, ket mariknana ti nadaras a pannakaanamong daytoy ta agpada nga ilunglungalong ti mayoria ken minoria ti anti-political dynasty bill.
Iparit ti 1987 Constitution ti political dynasty, ngem saan a pulos a naipatungpal daytoy agsipud ta awan ti naaramid a linteg a mangipatungpal iti daytoy.
Retirado a heneral, nakemmeg gapu iti panangsugsog a mangtippuog iti gobierno
Mismo a ni House Speaker Faustino “Bojie” Dy III ti nangidaulo iti Kamara idi Nobiembre 10, nga indeklararna a maysa ti anti-political dynasty bill kadagiti prioridad a paglintegan a kayatna nga ipasa ti Kamara, agraman ti Independent Commission Against Infrastructure Corruption (ICAIC).
Iti panagtataripnong ti Legislative Executive Development Advisory Council (LEDAC) ken ni Presidente Marcos Jr., imbilangna dagitoy a kas priority measure ti administrasionna.
Kinuna ni Manila 1st district Rep. Ernesto Dionisio Jr. a ti panangipangruna ti presidente iti anti-political dynasty bill ti pagilasinan a kayat a talaga ti presidente nga ipasa daytoy singasing a linteg, ket panawenen a maaddaan ti pagilian iti kastoy. (Ellson Quismorio/Manila Bulletin//Lito Hilidon/Bannawag)
