Saan a maik-ikkan iti special treatment ni dati a mayor ti Bamban, Tarlac Alice L. Guo, a nasentensiaan iti tungpal-biag a pannakaibalud gapu iti qualified human trafficking, iti Correctional Institution for Women (CIW) iti Mandaluyong City.
Segun iti Bureau of Corrections (BuCor), da Guo ken amin dagiti padana a balud, ket adda iti babaen ti nainget a paglintegan, nga awan ti naited kenkuana a naidumduma a pribilehio wenno iti asino man a padana a balud.
Nayakar ni Guo iti CIW manipud iti Pasig City jail kalpasan a nasentensiaan idi Nobiembre 20 iti kasona a qualified human trafficking.
Inruar ti BuCor daytoy a waragawag kas sungbat kadagiti sayangguseng nga adda lallaki nga aglanglanga nga Intsik a simmarungkar ken ni Guo, ket inikkanda iti selpon.
Di maideklarar a SALN, umdas a pakaikkatan ti impeachable official
Inlawlawag ni CIW Chief Supt. Marjorie Ann Sanidad a dagiti laeng abogado ni Guo ti mapalubosan a sumarungkar kenkuana, kas maitunos iti naikeddeng a pagalagadan iti seguridad ken salun-at.
Innayon ni Sanidad a maiparit ti selpon iti uneg ti pagbaludan ket saan a pudno dagiti sayangguseng nga adda naala ni Guo a selpon sumagmamano nga aldaw kalpasan ti pannakaipupokna. (Jeffrey Damicog/Manila Bulletin//Lito Hilidon/Bannawag)
