Kiniddaw dagiti abogado ni dati a presidente Rodrigo Duterte iti Appeals Chamber ti International Criminal Court (ICC) a mapalubosan koma ida a mangsungbat iti argumento nga indatag ti prosekusion mainaig iti isyu ti hurisdiksion.
Itay kallabes, nagapelar dagiti abogado ni Duterte a mabalusingsing koma ti pangngeddeng ti Pre-Trial Chamber I (PTC I) a nangpasingked iti hurisdiksion ti ICC iti kaso ni Duterte, ngem ipapawaswas daytoy ti prosekusion.
Iti innem a panid a dokumento nga impila ti depensa idi Disiembre 9, dinakamatda ti Regulation 24(5) iti Regulations of the Court, a mangted iti kalintegan ti maysa a partido a sumungbat iti komento ti bangir a partido no adda baro nga isyu a saanda a ninamnama a madakamat kadagiti orihinal a naidatag.
Segun iti depensa, baro a banag kadakuada ti panangdakamat ti prosekusion iti Regulation 28 ti Regulations of the Court a saanda a napakpakadaan, isu a rumbeng laeng a maikkanda iti kalintegan a sumungbat.
Mapukpukaw a nobia, nasarakan iti Pangasinan
Malaksid iti apelarda ti hurisdiksion, adda pay impila ti depensa a petition to adjourn all legal proceedings gapu iti kunada a panagkapuy ti panunot ni Duterte.
Itay napan a bulan, saan a pinatgan ti Appeals Chamber ti apelarda iti interim release ni Duterte. (Raymund Antonio/Manila Bulletin//Lito Hilidon/Bannawag)
