Dagiti imbaga ni kontraktor a Cesarah Rowena “Sarah” Discaya a pagbutbutnganna ket resulta met laeng ti bukodna a biddut.
Daytoy ti kinuna ti Office of the Ombudsman (OMB) ita nga aldaw, Disiembre 11.
Segun ken ni Assistant Ombudsman Mico Clavano, pinanunot koma ni Discaya ti masakbayan ti minilion a Filipino a nagpeggad ti biagda gapu ta naipan iti sabali a banag dagiti pondo a nailatang kadagiti pasdek a mangsalaknib koma kadakuada iti panaglayus.
Kinuna ni Clavano nga adda kalintegan ni Discaya iti due process, ngem saan a mabalin a pagpambar ti buteng tapno liklikan ti panangsungbat.
Retirado a heneral, nakemmeg gapu iti panangsugsog a mangtippuog iti gobierno
Naidarum ni Discaya, presidente ti St. Timothy Construction Corporation, kasta met dagiti opisial ti Department of Public Works and Highways (DPWH) iti Davao Occidental, iti graft ken ti di mapiansaan a malversation of public funds, mainaig iti ₱96.5 a milion a “ghost” flood control project idi 2022.
Simmuko ni Discaya iti National Bureau of Investigation (NBI) idi Disiembre 9, sakbay pay a maipaulog ti warrant of arrest kontra kenkuana manipud iti regional trial court (RTC).
Nakalua ni Discaya iti maysa nga interbiu ti ABS-CBN ket kinunana a naapektaran unay dagiti annakna gapu iti isusukona. Ngem inlawlawagna a ti pangngeddengna a maiditene iti NBI ket para iti kinatalgedna, ket saan nga isusuko. (Czarina Nicole Ong Ki/Manila Bulletin//Lito Hilidon/Bannawag)
