Makisalip dagiti tallo nga estudiante iti agribusiness iti Mariano Marcos State University iti Batac City iti nailian a salisal dagiti baro a negosio a mamagbalin iti di unay maus-usar nga agricultural by-product iti naimas ken nasayaat a taraon.
Da Sheena Shane Dacanay, Danica Layan, ken Shina Marie Calderon ti nangyalat iti ₱250,000 a cash grant ken plake ti pammigbig iti kalkalpas a Regional Intercollegiate Competition iti babaen ti Young Farmers Challenge (YFC) a programa ti Department of Agriculture (DA).
Nangabak dagiti tallo gapu iti naisangsangayan nga aramidda ken ti kinapateg ti naisingasingda nga agribusiness innovation a maysa a nasarangsang, naraman ken naimbag iti salun-at a taraon manipud iti bugas ti saba (banana pseudostem) a ninagananda iti "SAHA Crunch."
Kinuna ni Michael Vincent Vea, a coach dagiti estudiante, a panggep dagiti tallo nga usaren ti naipaay a grant tapno mapasayaat pay ti "SAHA Crunch."
ITI ILOCOS SUR: Mannalon, binagkongna ti kabsatna
Itandudo ti YFC program dagiti agtutubo a kas namnama ti pagilian ken tulbek iti pananggun-od iti Masaganang Bagong Pilipinas (Progressive New Philippines), nga ilunglungalong ni Presidente Marcos Jr. ken ni Sekretario ti DA Francisco Tiu Laurel Jr.
Silulukat ti salip kadagiti agtutubo a Filipino nga agtarigagay nga agnegosio wenno addaanen iti negosio iti panagtalon, panagkalap, panagtaraken iti dingo, ken dadduma pay nga aktibidad a mainaig iti agrikultura, ti YFC ket maysa a programa a mangipaay iti tulong pinansial kadagiti agtutubo a Filipino nga interesado iti agrikultura. (Leilanie Adriano/PNA//Lito Hilidon/Bannawag)
