Imbatad ni Lanao del Sur 1st District Rep. Zia Alonto Adiong, daulo ti Committee on Suffrage and Electoral Reforms ti Kamara, ita nga aldaw, Disiembre 13, ti napinget a panagkumit ti komitena a mangbukel iti napagkaykaysaan a bersion ti Anti-Political Dynasty Bill, a saan laeng a maitunos iti Konstitusion, no di ket pudpudno nga anamongan ken pagnumaran dagiti Filipino.
Segun ken ni Adiong, addan 14 a bersion ti Anti-Political Dynasty Bill a naipila iti komitena, ket agdalan daytoy iti nainget a pannakatingiting, ken inawis ni Adiong a mangted iti kapanunotan, singasing, ken rekomendasion dagiti kakaduana iti Kamara tapno mabukelda ti kasayaatan a bersion para iti pagilian.
Ti Anti-Political Dynasty Bill ti maysa kadagiti paglintegan a prioridad nga ipaulog ti Kamara iti babaen ti panangidaulo ni House Speaker Faustino “Bodjie” Dy III.
Napasingkedan pay daytoy a panagkumit idi pormal a kiniddaw ni Presidente Marcos Jr. iti Kongreso nga ipangpangrunada nga ipasa ti Anti-Political Dynasty Bill a mangyeg iti pudpudno a reporma iti politika ti pagilian. (PNA//Lito Hilidon/Bannawag)
