Impalgak ti Department of Foreign Affairs (DFA) idi Disiembre 14 nga awan ti naireport a nairaman a Filipino iti pammaltog ti dagiti terorista a nangpapatay ken nangdangran iti adu a tattao iti Bondi Beach iti Sydney, Australia.
Kinuna ti DFA a makikikoordinar ti Philippine Consulate iti Sydney kadagiti autoridad ti Australia tapno makompirmarda no adda nairaman a Filipino.
Saan a nababbaba ngem iti 15 ti natay idinto a 40 ti nadangran kalpasan a pinalpaltogan ida ti dua a lallaki a mapapati nga agamallaki nga agama, a pinuntiriada dagiti komunidad dagiti Hudio a mangamrambak iti Hannukah iti Bondi, segun iti polis ti Australia.
Natay ti ama suspek idi nagresponde dagiti polis; idinto a kritikal ti kasasaad ti anakna iti ospital.
Kasapulan ti natibker ken nainkalintegan a pagtaktakderan iti parikut iti WPS --NMC
Inyebkas ti DFA ti pannakipagriknada kadagiti pamilia dagit biktima, ken binalakadanna dagiti Filipino iti Sydney nga agridam, liklikan dagiti naapektaran a lugar, ken suroten dagiti pakdaar ti lokal nga autoridad.
Pinakdaaran ti Embahada ti Filipinas dagiti Filipino nga agtalinaedda iti uneg ti pagtaenganda ket liklikanda ti lugar ti Bondi agingga nga agtalna ti situasion sadiay. (Joseph Pedrajas/Manila Bulletin//Lito Hilidon/Bannawag)
