Imbilang ti Department of National Defense (DND) ken ti Armed Forces of the Philippines (AFP) a maysa laeng a propaganda ti panangideklarar ti Communist Party of the Philippines (CPP) iti uppat nga aldaw a holiday ceasefire, wenno panagsardeng ti gubat, ket agtultuloy latta dagiti operasion ti militar tapno natalged dagiti komunidad iti panawen ti Paskua ken Baro a Tawen.
Kinuna ni panakangiwat ti DND Assistant Secretary Arsenio R. Andolong ita nga aldaw, Disiembre 15, saan mapasardeng ti ania man a pasken ti panagtungpalda iti annongen ti militar, ket impaganagetgetda nga agtultuloy ti panangsuportarda iti Philippine National Police (PNP) iti panagtalinaed ti kappia ken linak iti pagilian.
Daytoy ti sungbat ti DND iti waragawag ti CPP iti impaulogna a cease fire order iti New People’s Army (NPA) manipud inton 12:00 iti parbangon ti Disiembre 25 agingga iti 11:59 iti rabii ti Disiembre 26, ken manipud iti 12:00 iti parbagon ti Disiembre 31 agingga iti 11:59 iti rabii ti Enero 1 (2026).
Segun ken ni Andolong, maysa laeng a propaganda stunt ti ceasefire ti terorista a grupo.
AFP, Estados Unidos, nagpatrulia iti WPS
Saan nga inawat ti AFP daytoy a ceasefire, ket imballaagda a saan a palubosan dagiti security force nga usaren dagiti armado a grupo ti panawen ti Paskua tapno agurnongda kadagiti kakaduada ken agbalinda a pangta iti kinatalged ti publiko.
Nupay kasta, ingunamgunam ni Andolong ti awis ti gobierno nga idian koman dagiti kameng ti NPA ti kinaranggas ket surotenda ti dana nga agturong iti talna ken panagdur-as. (Martin Sadongdong/Manila Bulletin//Lito Hilidon/Bannawag)
