Nagkiddaw ni Senador Joseph Victor “JV” Ejercito kadagiti kameng ti Senado ken Kamara ita nga aldaw, Disiembre 15, a panunotenda manen ti desisionda mainaig iti pondo para iti tulong a medikal iti 2026 national budget.
Nupay saan a nakadar-ay ni Sen. Ejercito iti bicameral conference committee gapu ta adda isuna iti ospital, sinuratanna ti bicam ket inyebkasna ti pakaseknanna iti naaprobaran a pondo para iti Medical Assistance to Indigent and Financially Incapacitated Patients (MAIFIP).
Impakdaar ni Ejercito a ti pannakaipangato a dagus ti pondo ti MAIFIP -- manipud ₱24.23 a bilion iti National Expenditure Program (NEP) ket nagbalin a ₱51.6 a bilion iti bersion ti bicam -- ket mabalin nga ibilang dagiti kritiko a napolitikaan ti gandatna a pannakatagiben ti salun-at, a mangbalusingsing iti panggep ti Universal Health Care (UHC) Act.
Insingasing ketdi ni Ejercito a direkta a maipan latta koman ti ₱51.6 a pondo para iti PhilHealth wenno kadagiti ospital ti gobierno, ta saan a rumbeng nga agpakaasi dagiti Filipino iti pannakaipaay ti serbisio para iti salun-at.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Ejercito a no panggep ti Kongreso a siguraduen a maited dagiti umisu a medical assistance kadagiti marigrigat, ken kadagiti agrigat no maaddaan iti sakit, masapul a tingitingenda ti nakadakdakkel a ngimmatuan ti pondo ti MAIFIP. (Hannah L. Torregoza/Manila Bulletin//Lito Hilidon/Bannawag)
