Inaprobaran ti Senado ti Citizens Access and Disclosure of Expenditures for National Accountability (CADENA) Act iti maikatlo ken pinal a pannakaibasana idi Disiembre 15.
Inanamongan dagiti 17 a senador nga awan ti simmupiat (17-0) wenno saan nagbotos, ti Senate Bill (SB) No. 1506 a mangipasdek iti National Budget Blockchain System a mangirekord ken mangmonitor kadagiti amin a paset ti proseso iti pannakabukel ti national budget.
Ti CADENA Act ti maysa kadagiti gakat a linteg a nairaman a prioridad nga aprobaran ti Legislative-Executive Development Advisory Council (LEDAC).
Segun ken ni Sen. Paolo “Bam” Aquino IV, impilana daytoy a gakat a linteg kas sungbat iti kumarkaro a pungtot ti publiko iti panagkunniber ken iti pannakadusa dagiti nagbasol iti naanomalia a flood control project.
Pannakatay ni dati a DPWH Usec. Cabral, maim-imbestigar
Maibasar iti SB 1506, mandaranna dagiti amin nga ahensia ti gobierno a y-upload-da ken regular a mantenerenda dagiti dokumento a naglaon iti detalye ti badiet -- agraman dagiti kontrata, gatad ti proyekto, listaan dagiti materiales, ken rekord ti pananggatang -- iti maysa a Digital Budget Platform.
Makatulong daytoy tapno mabalin a makita ti publiko dagiti dokumento, saan a mapalso, nalaka a makita ti napanan ti pondo, open-source, ken nalaka a beripikaren.
Mabalin a maidarum iti administratibo wenno kriminal a kaso dagiti opisial ti gobierno a saan a mangiparang iti kasapulan a dokumento wenno mang-upload kadagiti palso nga impormasion.
Dinagadag ni Sen. Aquino dagiti kakaduada iti Kamara a pardasanda koma nga ipasa ti bersionda iti gakat a linteg .
Ni Negros Occidental 3rd District Rep. Javier Miguel Benitez ti nangipila iti House Bill No. 6761, a bersion ti Kamara iti CADENA Act ti Senado. (Hannah L. Torregoza/Manila Bulletin//Lito Hilidon/Bannawag)
