Ni MARILYN C. CONTILLO
Mapan a 260 nga agindeg iti Santa, Ilocos Sur ti napili a benepisiario ti kaudian a TUPAD Program ti Department of Labor and Employment (DOLE), kas impakaammo ni Santa Mayor Jeremy Jesus Bueno III itoy nga aldaw, Disiembre 17, 2025.
Kinuna ni Mayor Bueno a prioridad dagiti naapektaran iti Super Typhoon Uwan, nangruna dagiti nadadaelan iti pagtaengan. Naipaayan dagitoy iti temporario a panggedan iti 10 aldaw babaen ti panagdalusda iti igid ti baybay. Agsueldoda iti PhP505 iti inaldaw wenno PhP5,050 iti 10 aldaw.
Nangiwayat pay dagiti TUPAD Program beneficiaries iti panagmula iti bakawan (mangrove) iti igid ti baybay. Dagiti dadduma, nagmulada kadagiti nateng (Gulayan project) iti lugarda, ken nangaramidda pay iti bukodda nga MRF wenno materials recovery facility tapno naur-urnos ti pannakaimanehar ti basura iti lugarda.
ITI ILOCOS SUR: Mannalon, binagkongna ti kabsatna
Sakbay daytoy, naipaay iti Santa ti 185 slots itay napan a bulan ken naikkan met iti prioridad dagiti biktima ni Bagyo Nando, kas impakaammo ni Kimberly Anne Ritua-Tabudlo ti Office of the Mayor.
